La seleición asturiana UEFA espera rival pa la segunda fase estatal

La victoria por 2-0 a Euskadi nel tercer partíu del grupu B dio'l pase a los de Clemente Sánchez.

Necesitaba ganar, o un empate con munchos goles, ayeri nel Nuevu Nalón y la seleición asturiana UEFA nun falló. Sicasí, nun consiguiría decantiar el partíu hasta'l tramu final, cuando Liam López consiguía nel minutu 84 rematar a gol de cabeza a la salida d'un córner.

Col recuerdu del empate 1-1 con Murcia del vienres nel 92, neutralizando asina'l tantu incial de Montequín, Asturies non sólo caltendría la ventaya, sinón que l'ampliaría gracies a una gran xugada individual nuna contra de Sergio González. D'esta forma, la seleición amateur clasificaba al algamar el primer puestu con 4 puntos, polos 2 de los murcianos y 1 de los vascos, conxuntos que'l sábadu empataran en L'Entregu a 2 goles.

La siguiente eliminatoria de la fase estatal de la Copa de Rexones UEFA va ser a partíu únicu por sortéu. Xunto a Asturies clasificaron como campeones de grupu La Rioja, Comunidad de Madrid, Cantabria, Aragón y Andalucía, mentes que Castilla-La Mancha pasa como meyor segunda.

Como segundu meyor segundu clasificáu empataron en too Catalunya y Galicia, polo que va sortiase tamién esta plaza pa completar el cuadru nun actu previstu esta mesma selmana.

Na imaxe, Sánchez y los sos xugadores celebren la clasificación nel Nuevu Nalón. Semeya propiedá de la Real Federación de Fútbol del Principáu d'Asturies.