La Mesa d’Instituciones Culturales, primer pasu pa la creación del Conseyu de la Cultura d’Asturies

Representantes de les alministraciones autonómica y llocales, de la Universidá d’Uviéu y de los equipamientos culturales públicos y privaos aconceyaron pa constituyir la Mesa d’Instituciones Culturales. Darréu van convocase otros siete grupos sectoriales.

L’oxetivu de la Mesa d’Instituciones Culturales ye poner en común necesidaes y potenciar estos recursos. Nel alcuentru celebráu na tarde d’ayeri na Llaboral informóse sobre’l procesu d’ellaboración de los proyeutos de les lleis d’archivos, de museos y de biblioteques, que, por exemplu esti últimu, plantega la universalización del derechu de la ciudadanía al accesu a los servicios bibliotecarios, independientemente del conceyu de residencia, y abordáronse diferentes proyeutos en común, como’l qu’impulsen la Conseyería de Cultura, Política Llingüística y Deporte y la Universidá d’Uviéu pa entamar unes xornaes sobre les bones práctiques nos museos.

La conseyera Ana Vanessa Gutiérrez rescampló na sesión la importante función que desenvuelven los equipamientos culturales del país al ser garantes y promotores del accesu universal a la cultura y dinamizadores de les zones onde s’allugen. Añadió tamién que favorecen la cohesión territorial y social.

Estratexa de la Cultura Asturiana

Al maxen d’esta mesa sectorial yá constituyida, la conseyería trabaya n’otres siete venceyaes a los ámbitos de la tradición, les artes escéniques, el cine y el campu audiovisual, les lletres, la música, les artes, y los videoxuegos y innovación. Una vez formaos, van escoyese representantes de cada grupu de trabayu pa constituyir un nuevu Conseyu de la Cultura cola intención de facilitar la tresversalidá y la cooperación ente los diferentes ámbitos del sector.

Les meses, “que persiguen facilitar el diálogu, la coordinación y la collaboración ente les diferentes instituciones”, apunten dende Cultura, van encargase de canalizar pidimientos y propuestes, asina como d’asesorar al Gobiernu tanto nes sos polítiques de fomentu de la cultura como na evaluación de la situación de los profesionales. Tamién van ocupase d’ellaborar, xunto cola Alministración, una radiografía nueva d’estes actividaes nel país que van sirvir de base para redautar la Estratexa de la Cultura Asturiana.

Esti modelu de xestión nuevu “permitirá planificar de forma conxunta y consensuada les polítiques públiques orientaes a potenciar la cultura”, aseguren.

Llista d’integrantes

La Mesa d’Instituciones Culturales tien los siguientes integrantes:

• Ana Vanessa Gutiérrez, presidenta.
• Pablo Gasalla (direutor xeneral de Patrimoniu Cultural), vicepresidente.
• Alfonso Palacio (direutor del Muséu de Belles Artes d'Asturies), vocal.
• María Antonia Pedregal (direutora del Muséu Arqueolóxicu d'Asturies), vocal.
• Montserrat Roces (responsable del área de coordinación d'Equipamientos Culturales de la Sociedá Pública de Xestión y Promoción Turística y Cultural d'Asturies), vocal.
• Ramón Rodríguez (direutor del RIDEA), vocal.
• Carlos Cuadros (direutor del Centru Cultural Internacional Niemeyer), vocal.
• Pablo de Soto (xerente de LLABoral Centru d'Arte y Creación Industrial), vocal.
• Lydia Santamaría (direutora del Muséu Barjola), vocal.
• Concepción Paredes (direutora del Archivu Históricu d'Asturies), vocal.
• Juan Miguel Menéndez (direutor de la Biblioteca d'Asturies 'Ramón Pérez de Ayala'), vocal.
• Fernando García Abella (direutor de la Biblioteca Pública Xovellanos), vocal.
• José Antonio Roque y Sandra Cuesta (Federación Asturiana de Conceyos), vocales.
• Daniel Sandoval (Fundación Museo y Circuito Fernando Alonso), vocal.
• Santiago González (Fundación Archivo de Indianos-Museo de la Emigración y Fundación de Nuevas Tecnologías y Cultura), vocal.
• Otilia Requejo (Museo de la Iglesia de Asturias), vocal.
• Judit Hidalgo (Biblioteca del Seminario Metropolitano de Oviedo), vocal.
• Adolfo Mariño (Museo de Covadonga), vocal.
• María Pilar García Cuetos (Universidá d'Uviéu).
• Mariana Suárez (Serviciu de Instituciones Culturales).
• Antón García (direutor xeneral d'Aición Cultural y Normalización Llingüística).
• José Antonio Garmón (direutor xeneral d'Innovación y Cambiu Social).
• Olmo Ron (direutor xeneral d'Alministración Llocal).
• David Artime (direutor xeneral d'Inclusión Educativa y Ordenación).
• Juan Ponte (direutor xeneral d'Axenda 2030).
• Julio González Zapico (direutor xeneral de Comerciu).
• Javier Fernández Rodríguez (direutor xeneral d'Estratexa Dixital y Intelixencia Artificial).