“La cooficialidá ye la única forma de protexer les nueses llingües propies”, afirma Guillermo Peláez

El conseyeru de Facienda y Fondos Europeos y voceru del Gobiernu llamentó la posición d’Álvaro Queipo y pidió al PP que rectifique y tome l’exemplu de Galicia: “¿Por qué equí distancia y fraya lo qu’ellí xune y cohesiona?”. “Vamos llegar hasta’l final”, insistió.

“Nós plantegaremos una proposición de llei. Pa la so toma en consideranza será suficiente una mayoría simple qu’esperamos consiguir. Ehí yá quedará nidio que la representación mayoritaria de la sociedá defende’l camín hacia la oficialidá. Pero llueu, nun nos engañamos, cuando llegue’l momentu de votar la proposición de llei, sí será necesario’l sofitu del PP”, analizó ayeri depués de conocer la postura de Queipo.

“Magar esi portazu, vamos llegar hasta’l final. Primero porque somos un gobiernu de diálogu y consensu y nun renunciamos a que’l PP rectifique” y, en segundu llugar “porque ye tiempu de demostrar l’asturianismu con fechos, non de boca. La política seria nun va de quedar bien con tol mundu. Nun se trata de dicir a caún lo que quier oyir”.

Criticó’l voceru del Gobiernu que Queipo dixera que la oficialidá divide a la sociedá asturiana: “¿A quién divide, si precisamente buscamos el máximu consensu? Pienso en Galicia, onde’l PP considera que’l gallegu ye patrimonio de tola sociedá. ¿Por qué equí distancia y fraya lo qu’ellí xune y cohesiona? Nunca vimos que los populares gallegos aseguren que la oficialidá ye una imposición que retaya les sos llibertaes, sinón tolo contrario. Otra cosa ye que la oficialidá divida al PP asturianu. Si ye asina, que lo reconozan”.

“Dende’l Gobiernu del Principáu d’Asturies tamos convencíos d’aprobar esa cooficialidá, que ye necesario, que ye la única forma de protexer les nuese llingües propies, y por ellos vamos dir hasta’l final”, aseguró Peláez.

Na semeya, Peláez nuna intervención pasada.